కొత్త దర్శకుడితో కల్యాణ్ రామ్ 'మిలియనీర్ '

హీరోగా కల్యాణ్ రామ్ వరుస సినిమాలను ప్లాన్ చేసుకుంటున్నాడు. ఒక వైపున 'ఎమ్మెల్యే' .. మరో వైపున 'నా నువ్వే' సినిమాలను ముగింపు దశకి తీసుకొచ్చిన కల్యాణ్ రామ్, తాజాగా మరో సినిమాను అంగీకరించినట్టు సమాచారం. కొత్త దర్శకుడితో ఆయన ఈ సినిమా చేయనున్నట్టు తెలుస్తోంది. ఈ సినిమాకి 'మిలియనీర్' అనే టైటిల్ ను ఖరారు చేసుకున్నారట.

'నిన్నుకోరి' కథతో నాని దగ్గరికి దర్శకుడు శివ నిర్వాణను పంపించి .. ఆ ప్రాజెక్టు ఓకే కావడంలో కోన వెంకట్ ప్రధానమైన పాత్రను పోషించాడు. అలాగే తాజాగా మరో కొత్తదర్శకుడిని కల్యాణ్ రామ్ దగ్గరికి పంపించి ఆ కథకు గ్రీన్ సిగ్నల్ వచ్చేట్టుగా చేశారని అంటున్నారు. విభిన్నమైన కథతో ఈ సినిమా రూపొందనుందని వినికిడి. త్వరలోనే ఈ ప్రాజెక్టుకు సంబంధించిన మిగతా వివరాలను వెల్లడించనున్నారు. ఈ సినిమా తరువాతనే పవన్ సాదినేనితో కలిసి కల్యాణ్ రామ్ సెట్స్ పైకి వెళతాడని చెబుతున్నారు.